Ганарымся пераможцамі конкурсу студэнцкіх лабараторый!

15 красавіка 2019 года адбыўся конкурс “Лепшая студэнцкая навукова-даследчая лабараторыя”, у якім філфакаўцы занялі ІІ месца.

Мерапрыемства ўрачыста адкрыла прарэктар па навуковай рабоце Ганна Васільеўна Торхава.

У конкурсе прынялі ўдзел пятнаццаць СНДЛ універсітэта. Філалагічны факультэт годна прадставіла СНДЛ “Сродкі выражэння экспрэсіўнасці ў мове і маўленні” (навуковы кіраўнік – дацэнт кафедры мовазнаўства і лінгвадыдактыкі Наталля Пятроўна Лобань).

З мультымедыйнай прэзентацыяй вынікаў сваёй працы перад журы, канкурсантамі і групамі падтрымкі выступілі члены лабараторыі студэнткі 4-га курса Алена Рагілевіч, Уладзіслава Кабушка і Лізавета Тумар.

Усе яны – пастаянныя ўдзельнікі міжнародных і рэспубліканскіх навуковых канферэнцый, міжнародных круглых сталоў і семінараў. Пра поспехі ў навуцы сведчаць шматлікія публікацыі, сярод якіх ёсць і артыкулы ў замежных выданнях (Прага, Вільнюс), у выданнях, уключаных у пералік ВАК (часопіс “Роднае слова”).

У рамках лабараторыі распрацоўваецца навуковае даследаванне “Канатонімы з нацыянальна-культурным кампанентам у беларускіх мастацкіх тэкстах” Алены Рагілевіч, якое перамагло ў конкурсе грантаў Міністэрства адукацыі на 2019 год.

Лепшыя навуковыя даследаванні лабараторыі амаль штогод удзельнічаюць у Рэспубліканскім конкурсе навуковых работ студэнтаў ВНУ і атрымліваюць дыпломы 2 і 3 катэгорыі. У 2017 годзе ІІ катогорыя прысуджана рабоце старшыні – Алены Рагілевіч. Варта сказаць, што Алена з тых студэнтаў, якімі можа ганарыцца не толькі лабараторыя, але і факультэт, універсітэт у цэлым. Яна – уладальніца стыпендыі Прэзідэнта Рэспублікі Беларусь, пераможца мінулагодняга конкурсу “Лепшы студэнт у намінацыі навукова-даследчая дзейнасць”, аўтар 15 навуковых артыкулаў, старшыня факультэцкага і намеснік старшыні Савета Студэнцкага навуковага таварыства БДПУ.

У ліку іншых дасягненняў удзельніцы конкурсу расказалі пра некалькі ўжо рэалізаваных цікавых навуковых праектаў: “Слоўнік канатацыйных онімаў беларускай мовы”, “Слоўнік неафіцыйных мікратапонімаў горада Мінска”, “Слоўнік канатацыйнай лексікі беларускай мовы”, “Навучальна-метадычныя комплексы па арфаграфіі і арфаэпіі беларускай мовы”.

Прэзентацыя завяршылася эмацыйным прызнаннем дзяўчат: “Навука і вопыт – гэта школа, у якой урокі каштуюць дарагога, і такой школай для нас стала наша лабараторыя. Тут мы зразумелі: чым больш ведаеш, тым больш можаш! Шлях навукі складаны, цярністы, але, нягледзячы на гэта, менавіта навука з’яўляецца самай лепшай, трывалай, самай светлай апорай у жыцці”.

         Віншуем удзельнікаў лабараторыі і навуковага кіраўніка!

         Поспехаў і навуковага плёну!