“Максімавы нашчадкі” працягваюць зорны шлях па Стаўбцоўскім раёне

Другі дзень Зорнага паходу філфакаўцаў пачаўся з ушанавання памяцi воiнаў i партызан, якія аддалі жыццё за вызваленне Стаўбцоўскага раёна.

Затым было наведванне установы з даўняй і багатай гісторыяй – “Мікалаеўшчынскага вучэбна-педагагічнага комплексу дзіцячы сад – сярэдняя школа імя Якуба Коласа”. У мінулым годзе школа, дзе вучыўся беларускі класік і якая цяпер носіць яго імя, адзначыла 150-гадовы юбілей. У Мікалаеўшчыне філфакаўцы выступілі з канцэртнай праграмай і правялі прафарыентацыю.

Зорнікі атрымалі задавальненне ад наведвання філіяла Літаратурна-мемарыяльнага музея Якуба Коласа, дзе вопытны экскурсавод вельмі цікава і зразумела распавёў пра жыццёвы і творчы шлях свайго выдатнага земляка.

Наступны прыпынак – Вішнявецкая сярэдняя школа. Тут прайшоў чарговы канцэрт, пасля якога студэнты расказалі гледачам пра ўніверсітэт, валанцёрскую дзейнасць. Чарговы дзень скончыўся выступленнем у Новасвержанскай сярэдняй школе.

Зорнікі выказваюць падзяку вучням і настаўнікам Стаўбцоўшчыны за цёплы прыём і шчырыя эмоцыі!