Творчая гасцёўня збірае сяброў

На філалагічным факультэце БДПУ 14 верасня 2022 года ў межах Тыдня роднай мовы адбылася творчая гасцёўня, у якой прынялі ўдзел першы намеснік старшыні Саюза пісьменнікаў Беларусі Алена Анатольеўна Стэльмах, старшыня Мінскага абласнога аддзялення Саюза пісьменнікаў Беларусі Леанід Міхайлавіч Крыванос і паэтэсы Таццяна Рыгораўна Каленік і Марына Аляксееўна Лайкова.

Плённай і актыўнай працы ўдзельнікам мерапрыемства пажадала намеснік дэкана Алёна Ігараўна Жышкевіч, якая адкрыла сустрэчу.

Леанід Міхайлавіч пазнаёміў прысутных з дзейнасцю аддзялення, звыдадзенымі ў Год гістарычнай памяці кніжнымі навінкамі. Найбольшую цікавасць у слухачоў выклікала кніга “Няўжо забыцца можна пра вайну”.

Таццяна Рыгораўна падзялілася сваімі ўспамінамі пра Максіма Танка, які натхніў яе на паэтычную творчасць, расказала аб дзейнасці творчай пляцоўкі “Сябрына” і стварэнні аднайменнага альманаха.

Чытанне вершаў Аленай Анатольеўнай выклікала шчырае захапленне ў студэнтаў і выкладчыкаў, а таксама стала штуршком для адкрытага дыялогу пра мары, вытокі творчасці і шлях да прызнання.

Завяршыла творчую гасцёўню Марына Аляксееўна, якая выканала песні на вершы Максіма Танка, Міколы Шабовічаі іншых аўтараў.

Вынікам сустрэчы сталі дамовы аб далейшым супрацоўніцтве з Саюзам пісьменнікаў Беларусі і ўдзеле ў яго працы таленавітых студэнтаў філалагічнага факультэта.